भृकुटी माध्यमिक विद्यालय, बुड्ढीले मंगलबार ५८औँ वार्षिकोत्सव तथा २३औँ अभिभावक दिवस विविध कार्यक्रमका साथ मनाएको छ। विद्यालय परिसरमा आयोजित कार्यक्रममा विद्यार्थीहरूले सांस्कृतिक प्रस्तुति प्रस्तुत गरेका थिए भने विभिन्न विधामा उत्कृष्ट विद्यार्थीहरूलाई सम्मान गरिएको थियो।
कार्यक्रमका प्रमुख अतिथि वडा नम्बर ४ का वडा अध्यक्ष सुसिल कुमार चौधरीले विद्यालयको शैक्षिक प्रगतिप्रति प्रशंसा गर्दै भृकुटी माविलाई जिल्ला तथा प्रदेशकै उत्कृष्ट शैक्षिक संस्थाका रूपमा विकास गर्नुपर्नेमा जोड दिनुभयो। सामुदायिक विद्यालयतर्फ विद्यालयको शैक्षिक नतिजा उत्कृष्ट रहेको उल्लेख गर्दै उहाँले शिक्षक, विद्यार्थी र अभिभावकको सक्रिय भूमिका आवश्यक रहेको बताउनुभयो।
विशिष्ट अतिथि वडा नम्बर ५ का वडा अध्यक्ष रोम बहादुर थापाले विद्यालय यस क्षेत्रकै नमुना विद्यालय बन्न सफल भएको भन्दै शुभकामना व्यक्त गर्नुभयो। साथै विद्यालयको थप स्तरोन्नतिमा ध्यान दिनुपर्ने र विद्यार्थीको शैक्षिक विकासमा विद्यालयसँगै अभिभावकको भूमिका पनि महत्वपूर्ण हुने उहाँको भनाइ थियो।
कार्यक्रममा विद्यालयका प्रधानाध्यापक बेदप्रकाश भुसालले विद्यालयको वार्षिक प्रगति प्रतिवेदन प्रस्तुत गर्नुभएको थियो।
कार्यक्रम विद्यालय व्यवस्थापन समितिका अध्यक्ष मिनराज बेल्वासेको अध्यक्षता, सहायक प्रधानाध्यापक ईश्वर बहादुर पुनको स्वागत मन्तव्य तथा शिक्षक कृष्णप्रसाद घिमिरेको सञ्चालनमा सम्पन्न भएको थियो।
हाल भृकुटी माध्यमिक विद्यालयमा ९ सय ११ जना विद्यार्थी अध्ययनरत रहेका छन्।
प्रकाशित मिति: २०८२ माघ २० गते
