प्रतिनिधिसभा निर्वाचन अन्तर्गत कपिलवस्तु निर्वाचन क्षेत्र नम्बर १ बाट नेपाली कम्युनिष्ट पार्टी (तारा चिन्ह) का तर्फबाट उम्मेदवारी दर्ता गरेका कृष्णबहादुर कुवँरले मतदाता भेटघाट तथा जनसम्पर्क अभियानलाई तीव्र बनाएका छन्।
निर्वाचन मिति नजिकिँदै जाँदा कुवँर गाउँ–गाउँ र टोल–टोलमा पुगेर आफ्ना नीति, कार्यक्रम र एजेन्डा प्रस्तुत गर्दै आम मतदातासँग प्रत्यक्ष संवादलाई प्राथमिकतामा राख्दै आएका छन्।
विभिन्न स्थानमा आयोजित भेटघाट तथा छलफल कार्यक्रममा सहभागी हुँदै कुवँरले आफूलाई मात्र उम्मेदवार नभई जनतालाई नै वास्तविक शक्ति भएको बताउँदै आएका छन्। “म प्रतिनिधि मात्र हुँ, चुनाव लड्ने र जित्ने भनेका जनता नै हुन्,” भन्दै उनले जनमतको सम्मानलाई पहिलो प्राथमिकतामा राखेको उल्लेख गरेका छन्।
कपिलवस्तु–१ का मतदातासँग प्रत्यक्ष संवाद गर्दै कुवँरले विकास, सुशासन र जवाफदेहितालाई आफ्नो प्रमुख चुनावी एजेन्डा बनाएको स्पष्ट पारेका छन्। शिक्षा र स्वास्थ्य सेवाको सुधार, युवाका लागि रोजगारी सिर्जना, आधारभूत पूर्वाधार विकास तथा कृषिको आधुनिकीकरणमार्फत आत्मनिर्भर अर्थतन्त्र निर्माण गर्ने उनको योजना रहेको छ।
विगतमा घोषणा गरिएका विकास योजनाहरू प्रभावकारी रूपमा कार्यान्वयन नहुँदा जनतामा निराशा बढेको उल्लेख गर्दै उनले अब परिणाममुखी काममार्फत विश्वास जित्ने प्रतिबद्धता जनाएका छन्। “अब भाषण होइन, कामले मूल्यांकन हुन्छ। जनता नतिजा खोजिरहेका छन्,” भन्दै उनले पारदर्शिता र जवाफदेहितालाई अनिवार्य बनाउने बताए।
मतदाता भेटघाटका क्रममा स्थानीयवासीहरूले सडक, सिँचाइ, खानेपानी, शिक्षा र स्वास्थ्य सेवाका समस्या तथा सुझावहरू प्रस्तुत गरेका छन्। ती सबै सुझावलाई आगामी नीति तथा कार्यक्रम निर्माणको आधार बनाइने कुवँरले प्रतिबद्धता व्यक्त गरेका छन्।
राजनीतिमा नयाँ सोच, इमानदारी र ऊर्जाको खाँचो रहेको उल्लेख गर्दै कुवँरले युवाहरू, महिला तथा पिछडिएका समुदायको आवाज संसदमा प्रभावकारी रूपमा उठाउने दाबी गरेका छन्। “कपिलवस्तु–१ लाई विकास र सुशासनको नमुना निर्वाचन क्षेत्र बनाउने मेरो लक्ष्य हो,” उनले बताएका छन्।
कुवँरको निरन्तर सक्रियता, जनसम्पर्क र मतदाता भेटघाटले कपिलवस्तु–१ को राजनीतिक माहोललाई थप चलायमान बनाएको छ। आगामी दिनमा उनको अभियानले कस्तो जनसमर्थन पाउने हो भन्ने विषयमा स्थानीयस्तरमा चासो बढ्दै गएको छ।
प्रकाशित मिति: २०८२ माघ १६ गते
