काठमाडौं । नेपाली कांग्रेसका सभापति तथा पूर्वप्रधानमन्त्री शेरबहादुर देउवाले नेपालमा भ्रष्टाचार नियन्त्रणका लागि कानुन नै बनाएर अघि बढ्ने प्रधानमन्त्री आफू भएको बताएका छन्।
मंगलबार बसेको कांग्रेस केन्द्रीय कार्यसमिति बैठकलाई सम्बोधन गर्दै सभापति देउवाले भ्रष्टाचार अन्त्य गर्नकै उद्देश्यले आफूले प्रधानमन्त्री हुँदा भ्रष्टाचार निवारण ऐन, २०५९ जारी गरेको बताएका हुन्।
उनका अनुसार, ‘सामाजिक कुरितिको रूपमा रहेको कमैया प्रथा अन्त्यदेखि छुवाछुत मुक्त नेपाल घोषणा र भूमिसुधारका अभियान सुरु गर्न पाउनु गर्वको कुरा हो। भ्रष्टाचार निवारणका लागि ऐन ल्याउने काम पनि मैले गरेको हुँ,’ देउवाको भनाइ छ।
सभापति देउवाले जेन–जी पुस्ताले उठाएको भ्रष्टाचार अन्त्यको आवाजलाई पनि समर्थन व्यक्त गरेका छन्। साथै, उनले नेपाली कांग्रेसलाई जात, क्षेत्र, लिङ्ग र समुदायका विविधता समेट्ने मौलिक राष्ट्रिय पार्टीका रूपमा अघि बढाउने प्रयास गरेको उल्लेख गरे।
‘पार्टीभित्र आरक्षण व्यवस्था गर्दै समावेशी संरचना बनाएको छु। पाँचपटक प्रधानमन्त्री हुँदा सीमित समय भए पनि कतिपय क्षेत्रमा सुधारका ऐतिहासिक कदम चाल्न सफल भएको छु,’ देउवाले भने।
उनले महिलाको सम्पत्तिमाथि हक स्थापित गर्न मुलुकी ऐनको ११औं संशोधन गरेर पैतृक सम्पत्तिमा महिलाको स्वामित्व सुनिश्चित गरेको स्मरण गरे। साथै, दलित, महिला र जनजाति समुदायको उत्थानका लागि आयोग गठन गरी संरचनागत सुधारको पहल गरेको पनि उनले उल्लेख गरे।
प्रकाशित मिति: २०८२ आश्विन २९ गते
