कुरा नेपाल बुद्धभूमि। बुद्धभूमि नगरपालिका–४, डाबरामा जारी तेस्रो डाबरा कप २०८२ अन्तर्गतको फाइनल खेल सोमबार दिउँसो २ बजेबाट पारिजात पब्लिक स्कुल र नमुना ज्योति युवा क्लबबीच हुने भएको छ। राष्ट्रिय खेलाडीहरूको सहभागिताले झनै रोमाञ्चक बन्न लागेको फाइनल खेलप्रति दर्शकहरूको चासो उर्लिएको छ।
आज सम्पन्न सेमिफाइनल खेलमा पारिजात पब्लिक स्कुलले बकुलिपुर फुटबल क्लबमाथि ८–१ को शानदार जित निकाल्दै फाइनलमा प्रवेश गरेको हो। खेलको सुरुदेखि नै आक्रमणात्मक शैली अपनाएको पारिजातले बकुलिपुरलाई दवावमा राख्दै गोलको वर्षा गर्यो। बकुलिपुरले पनि एक सान्त्वना गोल गर्दै प्रतिस्पर्धा देखाए तापनि ठूलो अन्तरले हार्न पुगे।
अब फाइनल खेलमा पारिजात पब्लिक स्कुलले बलियो प्रतिद्वन्द्वी नमुना ज्योति युवा क्लबको सामना गर्नेछ। दुबै टिमका खेलाडीहरू उत्कृष्ट फर्ममा रहेका कारण खेल निकै प्रतिस्पर्धात्मक र रोमाञ्चक हुने निश्चित देखिन्छ।
डाबरा खेलमैदानमा सञ्चालन भइरहेको यो कप प्रतियोगिताले स्थानीय युवा प्रतिभा उजागर गर्ने अवसर प्रदान गर्दै आएको आयोजकको भनाइ छ। तेस्रो संस्करणमा लुम्बिनी प्रदेशका विभिन्न जिल्लाकाचर्चित युवा टोलीहरूको सहभागिता रहेकाले प्रतिस्पर्धा रोमाञ्चक हुँदै गएको क्लवका अध्यक्ष कमल काफ्लेले बताए।
स्थानीय दर्शकको उल्लेख्य उपस्थिति र उत्साहबीच प्रतियोगिता दिनप्रतिदिन झनै प्रतिस्पर्धात्मक बन्दै गएको आयोजकले जनाएको छ।
प्रकाशित मिति: २०८२ आश्विन ५ गते
