खसी किन्ने विषयमा भएको विवादले कुटाकुटमा परिणत हुँदा बाँकेमा एक व्यक्तिको ज्यान गएको छ।
नेपालगन्ज उपमहानगरपालिका–५ का ५२ वर्षीय जाबिद अली बेहनाको शुक्रबार निधन भएको जिल्ला प्रहरी कार्यालय बाँकेका प्रवक्ता डीएसपी दीपक पातलीले जानकारी दिएका छन्।
प्रारम्भिक अनुसन्धानअनुसार, जाबिदले किन्न ठानिएको खसी अर्को समूहले उठाएपछि विवाद चर्किएको थियो। विवाद झडपमा रुपान्तरण हुँदै ढुंगा प्रहारसमेत भएपछि गम्भीर घाइते भएका जाबिदलाई उपचारका लागि अस्पताल पुर्याइएको थियो। तर दिउँसो साढे २ बजे उपचारको क्रममा उनको मृत्यु भएको प्रहरीले जनाएको छ।
चारजना नियन्त्रणमा, सम्बन्धबारे अनुसन्धान जारी
घटनामा संलग्न रहेको आशंकामा चार जनालाई प्रहरीले नियन्त्रणमा लिई अनुसन्धान सुरु गरेको छ। प्रारम्भिक रूपमा मृतक र संलग्न पक्षबीच सालो–भेनाको सम्बन्ध रहेको भनिए पनि मृतक बेहना सालो थिए वा भेना भन्नेबारे थप सोधपुछ जारी रहेको डीएसपी पातलीले जानकारी दिए।
प्रहरीले घटनास्थलको विवरण संकलन गरी घटनालाई आपराधिक अनुसन्धानका रूपमा अघि बढाइएको जनाएको छ।
प्रकाशित मिति: २०८२ आश्विन ४ गते
