ऊर्जा, भौतिक पूर्वाधार तथा यातायात र सहरी विकास मन्त्रालयको जिम्मेवारी पाएका नवनियुक्त मन्त्री कुलमान घिसिङले कठिन परिस्थिति र चुनौतीपूर्ण समयमा जिम्मेवारी लिएको बताएका छन्।
ऊर्जा मन्त्रालयमा पदभार ग्रहण गर्दै मन्त्री घिसिङले भने, “देश अहिले सङ्कटपूर्ण मोडमा छ। राजनीतिक स्थायित्वतर्फ अगाडि बढ्न सकिन्छ भन्ने विश्वाससहित हामी ठूलो चुनौती सामना गर्न आएका हौं। यो सामान्य जिम्मेवारी होइन, तर भाग्ने होइन, जिम्मेवारी लिने बेला हो।”
उनले देशमा पछिल्लो समय भएको क्षतिलाई गम्भीर रूपमा लिँदै अबको बाटो पुनर्निर्माण र समाधानतर्फको हुने उल्लेख गरे। “अब हिंसा होइन, समाधान र पुनर्निर्माणको बाटो हो,” घिसिङले भने, “हामी समृद्धि र राजनीतिक स्थायित्वको दिशामा अगाडि बढ्नेछौं। सही निर्णय र कार्यान्वयनबाट राष्ट्रलाई सही अवतरणमा लैजाने हाम्रो दायित्व हो।”
उनले तीनवटै मन्त्रालय सम्हाल्दै समन्वयमा काम गरेर देश पुनर्निर्माणको अभियानमा लाग्ने प्रतिवद्धता जनाए।
प्रकाशित मिति: २०८२ भाद्र ३० गते
