काठमाडौं, भदौ २८ – राष्ट्रिय स्वतन्त्र पार्टी (रास्वपा)की नेता तथा पूर्व शिक्षामन्त्री सुमना श्रेष्ठले पार्टी परित्याग गरेकी छन्। उनले पार्टी नेतृत्वप्रति गम्भीर आरोप लगाउँदै सामाजिक सञ्जालमार्फत पार्टी छाडेको घोषणा गरेकी हुन्।
श्रेष्ठले लेखेकी छन्, “अब खुल्लारूपमा आक्रमण गर्न सजिलो बनाइदिएकी छु। मनलाग्दी चलुन्जेल मनलाग्दी गर्नुहोला, मैले पार्टी छाडे।”
पार्टीको केन्द्रीय समितिलाई जानकारी गराउँदै उनले नेतृत्वले बारम्बार गल्ती गर्ने तर कहिल्यै स्वीकार नगर्ने प्रवृत्तिप्रति असन्तुष्टि जनाएकी छन्। “गल्तीमाथि गल्ती गरिरहने र त्यसको बोझ पार्टीका सबै सदस्यले बोक्नुपर्ने? मलाई स्वीकार्य छैन,” उनले स्पष्ट रूपमा लेखेकी छन्।
श्रेष्ठका अनुसार पार्टीभित्र आलोचना गर्नेहरूलाई मिडिया ट्रायलमार्फत लक्षित गरिन्छ, जसले आलोचकहरूलाई अपमानित महसुस गराउँछ। उनले भनिन्, “जहिलेदेखि रास्वपाले देशभन्दा माथि पार्टी, र पार्टीभन्दा माथि व्यक्तिलाई राख्न थालेको हो, त्यतिबेलादेखि नै म आलोचना गर्दै आएकी हुँ।”
पार्टीभित्र आलोचनात्मक आवाजको सम्मान नगर्ने, नेतृत्व केन्द्रित राजनीतिमा रमाउने प्रवृत्तिप्रति असन्तुष्टि जनाउँदै उनले पार्टी छाडेकी हुन्।
प्रकाशित मिति: २०८२ भाद्र २९ गते
