काठमाडौँ — नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले कांग्रेस–एमाले नेतृत्वको गठबन्धन सरकार बिचौलिया र दलालहरूको दबाबमा बनेको आरोप लगाएका छन्।
नेपाल उद्योग वाणिज्य महासंघले पोखराको लेकसाइडमा शनिबार आयोजना गरेको कार्यक्रममा बोल्दै अध्यक्ष प्रचण्डले, सरकार गठन कुनै सिद्धान्त वा विचारधाराबाट नभई बाह्य प्रभाव र धम्कीको कारण भएको दाबी गरे।
उनले भने, “कांग्रेस–एमालेको सरकार उनीहरूको बुद्धिले बनेको होइन, यो दलाल र बिचौलियाको धाक र धम्कीबाट बनेको हो। हिजो डरले बनेको, आज पनि डरले टिकेको सरकार हो।”
सरकारप्रति आक्रामक रूपमा प्रस्तुत भएका प्रचण्डले कांग्रेस र एमालेले क्रोनी क्यापिटलिजम (निकटस्थ पुँजीवाद) र दलाल प्रवृत्तिको प्रतिनिधित्व गरिरहेको आरोप लगाए। “हामी त्यसको वैकल्पिक शक्ति हौं,” उनले दाबी गरे।
मध्यम वर्गको पक्षमा माओवादी आन्दोलन केन्द्रित रहेको बताउँदै उनले आफूहरू मध्यम वर्गकै प्रतिनिधि भएको स्पष्ट पारे। “ऋण मिनाह, सहकारी सुधार र तल्लो वर्गको उत्थान हाम्रो प्राथमिकता हो,” प्रचण्डले भने।
सहकारीको बचत अपचलनसम्बन्धी प्रसंग कोट्याउँदै उनले कांग्रेस–एमाले नेताहरूलाई समस्या उत्पत्ति गर्ने जडका रूपमा चित्रित गरे। “शक्तिशाली प्राधिकरणमार्फत ठगहरूलाई कारबाही गर्न खोज्दा सरकार नै ढालियो,” उनले गुनासो गरे।
प्रकाशित मिति: २०८२ भाद्र २१ गते
