काठमाडौं।
नेपाल सरकारद्वारा २६ वटा सामाजिक सञ्जाल बन्द गरेपछि सन्देश आदान–प्रदान गर्ने एप भाइबर गुगल प्ले स्टोरको शीर्ष स्थानमा पुगेको छ।
२४ घण्टा अघिसम्म प्ले स्टोरको ‘टप फ्री एप’ सूचीमा ५० औं स्थानभन्दा तल रहेको भाइबर एप अहिले एक नम्बरमा उक्लिएको हो। सरकारको निर्णयपछि फेसबुक र म्यासेन्जर जस्ता लोकप्रिय सामाजिक सञ्जाल चल्न छाडेपछि नेपाली प्रयोगकर्ताले वैकल्पिक एपको रूपमा भाइबर रोज्न थालेका छन्।
एन्ड्रोइड प्रयोगकर्ताबीच पछिल्लो २४ घण्टामा भाइबर एपको डाउनलोड अत्यधिक वृद्धि भएपछि ‘राकुटेन भाइबर म्यासेन्जर’ नेपालका लागि टप डाउनलोड एप बनेको हो।
बिहीबार सरकारले दर्ता नभएका सामाजिक सञ्जालहरू बन्द गर्ने निर्णय गरेसँगै फेसबुक, म्यासेन्जर, एक्स (पूर्व ट्विटर), टिकटक लगायतका एपहरू प्रयोग गर्न नसकिने अवस्थामा पुगेका छन्। यसको प्रत्यक्ष असर सामाजिक सञ्जाल प्रयोगकर्तामा परेको देखिन्छ।
यस कारणले गर्दा प्रयोगकर्ताहरू भाइबर, सिग्नल, टेलिग्राम जस्ता वैकल्पिक सन्देश पठाउने एपतर्फ आकर्षित भएका छन्। हाल भाइबर नेपालमा सर्वाधिक डाउनलोड हुने एप बनेको छ।
प्रकाशित मिति: २०८२ भाद्र २१ गते
