काठमाडौं ।
नेपालमा सामाजिक सञ्जाल फेसबुक बन्द गर्न थालिएको छ। सरकारको निर्देशनअनुसार इन्टरनेट सेवा प्रदायकहरूले क्रमशः सेवा अवरुद्ध गर्न थालेका हुन्।
इन्टरनेट सेवा प्रदायक कम्पनी वर्ल्डलिंकले केही समयअघि देखि फेसबुकमा पहुँच रोक लगाएको पुष्टि गरेको छ। कम्पनीका प्रमुख कार्यकारी अधिकृत केशव नेपालले सरकारको निर्देशनअनुसार फेसबुक बन्द गरिएको जानकारी दिएका छन्।
इन्टरनेट सेवा प्रदायक संघका अध्यक्ष सुधिर पराजुलीले सामाजिक सञ्जाल बन्द गर्ने प्रक्रिया सुरु भइसकेको र सबै प्रदायकबाट सेवा बन्द हुन केही समय लाग्न सक्ने बताएका छन्। “सरकारको निर्देशन अनुसार प्रक्रिया अघि बढिसकेको छ, विस्तारै सबै सेवा अवरुद्ध हुँदै जानेछ,” उनले भने।
यसैबीच, नेपाल टेलिकमले पनि सरकारको निर्देशनमा दर्ता नभइ सञ्चालनमा रहेका सामाजिक सञ्जाल प्लेटफर्महरू बन्द गरेको छ। टेलिकमले एक सूचना जारी गर्दै नेपाल दूरसञ्चार प्राधिकरणको पत्रका आधारमा यस्तो कदम चालेको उल्लेख गरेको छ।
सूचनामा सर्वोच्च अदालतको आदेश, मन्त्रिपरिषदको निर्णय र सञ्चार मन्त्रालयको निर्देशनअनुसार सामाजिक सञ्जाल प्रयोगलाई व्यवस्थित गर्न दर्ता नभएका प्लेटफर्महरू हालका लागि निष्क्रिय बनाइएको जनाइएको छ।
प्रकाशित मिति: २०८२ भाद्र २० गते
