काठमाडौं — प्रतिनिधि सभाका सभामुख देवराज घिमिरेले देश निर्माणको सबैभन्दा महत्वपूर्ण क्षेत्र राजनीति भएको बताउनु भएको छ।
पूर्वसांसद मञ्चको २६औं स्थापना दिवसका अवसरमा संसद भवनमा आयोजित कार्यक्रममा बोल्दै सभामुख घिमिरेले भने, “राजनीति सहि दिशामा रहे देशले उन्नति र प्रगति गर्छ, तर राजनीति विकृत भए सम्पूर्ण क्षेत्र प्रभावित हुन्छन्।”
उहाँले नेपालले विगतमा विभिन्न राजनीतिक आरोह-अवरोह भोगेको उल्लेख गर्दै, पूर्वसांसदहरुसँग यस्ता अनुभव र ज्ञान प्रशस्त रहेको बताउनुभयो।
सभामुख घिमिरेले वर्तमान संविधानले राखेका लक्ष्यहरू, संविधान कार्यान्वयन, सरकार निर्माण, र संसदको भूमिकालाई प्रभावकारी बनाउन पूर्वसांसदहरूको योगदान उल्लेखनीय रहेको बताउँदै, पूर्वसांसदहरूप्रति सम्मान र स्वास्थ्य उपचारको प्रवद्र्धनका लागि पहल गर्ने प्रतिवद्धता जनाउनुभयो।
उहाँले राज्यसँग पूर्वसांसदहरू कुन अवस्थामा छन् भन्ने विषयमा यथेष्ट जानकारी नभएको बताएर, यस अवस्थाको अन्त्य गर्न जरुरी रहेकोमा जोड दिनुभयो।
कार्यक्रममा मञ्चले ७० वर्ष उमेर पूरा गरेका पूर्वसांसदहरूलाई सम्मान गरेको थियो।
प्रकाशित मिति: २०८२ भाद्र १९ गते
