नागरिक उन्मुक्ति पार्टी (नाउपा) भित्रको आन्तरिक विवाद सतहमा आएको छ, जसको असर तल्लो तहका नेता तथा कार्यकर्तामा देखिन थालेको छ। अध्यक्ष रञ्जिता श्रेष्ठ र पार्टी संरक्षक रेशम चौधरीबीचको बढ्दो विवादले कार्यकर्ता निराश बनेका छन्।
पार्टीबाट कैलारी गाउँपालिकाको अध्यक्ष पदका उम्मेदवार रहनुभएका नेता भीष्मराज चौधरीका अनुसार, स्थानीयस्तरमा चुनावको तयारीमा जुटेका कार्यकर्ता अहिले शीर्ष नेतृत्वको भनाभन र गुटबन्दीले खिन्न बनेका छन्। “उहाँहरू सुध्रिनुहुन्छ भन्ने आशा छ, नत्र कार्यकर्ताले सोच्न बाध्य हुन्छन्,” चौधरीले भने।
दुई नेताबीचको विवादकै कारण सुदूरपश्चिम प्रदेशमा नाउपाले मुख्यमन्त्री गुमाएको, केही मन्त्री बर्खास्त भएको र पार्टीको विश्वसनीयता संकटमा परेको कार्यकर्ताहरूको गुनासो छ।
केही दिनअघि संरक्षक रेशम चौधरीले बहुमत केन्द्रीय सदस्यहरूको समर्थनमा अध्यक्ष श्रेष्ठलाई हटाउँदै सांसद लालवीर चौधरीलाई अध्यक्ष घोषणा गर्नुभएको थियो। तर निर्वाचन आयोगले श्रेष्ठलाई नै वैध अध्यक्ष मानेपछि विवाद झन् चर्किएको छ। पार्टी विभाजनको अवस्थामा पुगेको भन्दै केही कार्यकर्ताले पार्टी नै छाड्न थालेका छन्।
भीष्मराज चौधरीका अनुसार, तल्लो तहमा संगठन सक्रिय रहे पनि नेतृत्व तहको झगडाले कार्यकर्ताको मनोबल कमजोर बनेको छ। “हामी संगठन र मुद्दामा अडिग छौं,” उनले भने, “तर शीर्ष नेताको आचरणले झस्काएको छ।”
पार्टी अध्यक्ष श्रेष्ठको ‘चर्तिकलाप’ प्रति असन्तुष्टि जनाउँदै कैलारी गाउँपालिकाका अध्यक्ष शंकर चौधरीले भने, “पार्टीको विधि र अनुशासन विपरीत गतिविधि देखिएको छ, कार्यकर्ता त्यसबाट पीडित छन्। तर हामी अझै रेशमवादी विचारमा एकढिक्का छौं।”
भजनी नगरपालिका–३ का वडाध्यक्ष तथा नाउपाका नेता विक्रम चौधरीले भने यो विवादलाई ‘श्रीमान–श्रीमतीको झगडा’का रूपमा लिएका छन्। “यो त परालको आगो जस्तो हो,” उनले भने, “दुवै मिलेपछि सबै ठिक हुन्छ।”
प्रदेशसभा सदस्य कैलाश चौधरीले पनि विवादको असर कैलालीमा खासै नपरेको दाबी गर्दै, “ग्रासरुटका नेता, कार्यकर्ता र जनतामा विभाजन देखिँदैन। उनीहरू नेतृत्वबाट स्पष्टता र एकता चाहन्छन्,” भने।
थरुहट आन्दोलनको जगबाट उदाएको नाउपा २०७९ को निर्वाचनमा सुदूरपश्चिम र लुम्बिनी प्रदेशमा प्रभावशाली बनेको थियो। राष्ट्रिय पार्टी बन्ने नजिक पुगेको यस पार्टीप्रति जनताको सहानुभूति उच्च थियो। तर हालको आन्तरिक विवादले पार्टीको छवि र कार्यकर्ता मनोबलमा नकारात्मक असर पारेको देखिन्छ।
प्रकाशित मिति: २०८२ भाद्र १२ गते
