काठमाडौं — सवारीसाधनमा इम्बोस्ड नम्बर प्लेट जडान नगरेको भन्दै तत्काल कारबाही नहुने यातायात व्यवस्था विभागले स्पष्ट पारेको छ।
मंगलबार सार्वजनिक गरिएको विज्ञप्तिमा विभागले इम्बोस्ड नम्बर प्लेट अनिवार्य छैन भन्दै सवारीधनीहरूलाई आफैं अनुकूल समयमा आफ्नो सवारी दर्ता कार्यालयमा गएर स्वःस्फुर्त रूपमा जडान गर्न आग्रह गरेको छ।
विभागले प्रदेश कार्यालयहरूमा आवश्यक पूर्वाधार र जनशक्ति उपलब्ध गराइएको जानकारी दिंदै सेवा सहज बनाउन थप प्रबन्ध मिलाइने पनि जनाएको छ।
यातायात विभागले यसअघि भदौ ३ गते सूचना जारी गर्दै असोज १ गतेदेखि इम्बोस्ड नम्बर प्लेट अनिवार्य हुने उल्लेख गरेको थियो। तर उक्त सूचनापछि सार्वजनिक प्रतिक्रिया र आलोचना बढेपछि विभाग नरम अवस्थामा गएको देखिएको छ।
प्रकाशित मिति: २०८२ भाद्र ११ गते
