सुनसरी। सुनसरीको भोक्राहा नरसिङ गाउँपालिका ४ मा नेपाली कांग्रेसको चुनावी कार्यक्रममा विवाद बढेपछि प्रहरीले लाठीचार्ज गरेको छ।
सुनसरी क्षेत्र नं. ४ अन्तर्गत पर्ने भोक्राहामा उम्मेदवार ज्ञानेन्द्र कार्कीले आफ्नो चुनावी सभालाई सम्बोधन गर्न गइरहेको बेला बाटोमा राष्ट्रिय स्वतन्त्र पार्टी (रास्वपा) का केही युवाहरूसँग जम्काभेट भएको थियो। विवाद बढेपछि हातहालाहालको अवस्था सिर्जना भयो।
परिस्थिति असामान्य बन्दै गएपछि निर्वाचन सुरक्षामा खटिएका प्रहरीले दुवै पक्षका कार्यकर्तालाई तितरवितर बनाउन लाठीचार्ज गरेको सुनसरीका एसपी केशव थेवेले जानकारी दिनुभयो।
उनका अनुसार, विवादमा परेको दुवै पक्षका कार्यकर्ता छिमेकी नै भए पनि राजनैतिक दल फरक भएकाले झडपको अवस्था सिर्जना भएको थियो। यस क्रममा केहीबेर हाथापात र तनावको स्थिति बनेको थियो।
प्रकाशित मिति: २०८२ फाल्गुन ९ गते
