कपिलवस्तुको विजयनगर गाउँपालिकामा भएको एक सवारी दुर्घटनासँगै नेपाल–भारत सीमावर्ती क्षेत्रमा भइरहेको अवैध पशु तस्करीको अर्को घटनाको खुलासा भएको छ। विजयनगर गाउँपालिका–२ मगरघट्टास्थित भित्री सडक खण्डमा बोलेरो पिकअप भ्यान दुर्घटना हुँदा एक साइकल यात्री गम्भीर घाइते भएका छन् भने भारततर्फ लैजान लागिएका दर्जनौँ बाख्रा बरामद गरिएको छ।
प्रहरीका अनुसार २०८२ माघ १९ गते साँझ करिब ७ बजे मगरघट्टाबाट उठहवातर्फ जाँदै गरेको लु ३ च ७१८ नम्बरको बोलेरो पिकअप भ्यान अनियन्त्रित भई पल्टिएको थियो। दुर्घटनाका क्रममा सडक छेउमा रोकिराखेको साइकललाई ठक्कर दिँदा महाराजगञ्ज नगरपालिका–११ प्रभातनगर निवासी करिब २७ वर्षीय अजय कुमार भर गम्भीर घाइते भएका छन्।
इलाका प्रहरी कार्यालय गणेशपुरका अनुसार घाइते भरको टाउको, मुख तथा हातखुट्टामा चोट लागेको छ। उनलाई तत्काल उपचारका लागि चौराहा अस्पताल, बुटवल पठाइएको प्रहरीले जनाएको छ।
दुर्घटनापछि प्रहरीले गाडीको जाँच तथा चालकसँग सोधपुछ गर्दा आवश्यक कागजात नरहेको पाइएको थियो। थप अनुसन्धानका क्रममा उक्त बोलेरो पिकअप भ्यानमार्फत नेपालबाट भारततर्फ अवैध रूपमा निकासी गर्न ५७ वटा बाख्रा लोड गरिएको खुलासा भएको हो। बरामद गरिएका बाख्रामध्ये एक बाख्रा बिरामी अवस्थामा मृत फेला परेको र बाँकी ५६ वटा बाख्राको मूल्य करिब ३ लाख ९२ हजार रुपैयाँ बराबर आँकलन गरिएको प्रहरीले जनाएको छ।
प्रहरीले गाडी, चालक र बरामद बाख्राहरूलाई नियन्त्रणमा लिई जिल्ला प्रहरी कार्यालय कपिलवस्तुमा दाखिला गरेको छ। घटनासम्बन्धी आवश्यक कानुनी कारबाहीका लागि जिल्ला प्रहरी कार्यालयले भन्सार कार्यालय कृष्णनगरमा पठाइएको जानकारी दिएको छ।
यस घटनाले सीमावर्ती क्षेत्रमा अवैध पशु तस्करी अझै सक्रिय रहेको संकेत गरेको स्थानीयको भनाइ छ। स्थानीयले प्रहरीको मिलेमतो बिना यसरी खुलेआम पशु ओसारपसार सम्भव नहुने आरोपसमेत लगाएका छन्।
प्रकाशित मिति: २०८२ माघ २० गते
