कुरा नेपाल कपिलवस्तु। बुद्धभूमि नगरपालिका–२ गोरुसिङ्गेमा निर्माण गरिएको राम–दरबार राम–जानकी मन्दिर एक विशेष समारोहमार्फत समाजलाई औपचारिक रूपमा हस्तान्तरण गरिएको छ।
मन्दिर समाजसेवी तथा उद्यमी शुभलाल भुसालको पहल र निजी लगानीमा निर्माण गरिएको हो। स्वर्गीय बुबा, आमा तथा हजुरबुवाको स्मृतिमा निर्माण भएको यस मन्दिरमा भगवान् श्रीराम, माता जानकी, लक्ष्मण र हनुमानका मूर्तिहरू स्थापनासहित प्राण–प्रतिष्ठा प्रक्रिया सम्पन्न गरिएको छ।
करिब नौ लाख रुपैयाँ लागतमा बनेको मन्दिरको मूल चाबी भुसालले समारोहका अतिथिलाई हस्तान्तरण गरेका हुन्। दैनिकी सञ्चालन तथा नियमित सेवा–पूजाका लागि मासिक सहयोग उपलब्ध गराइने जानकारी पनि कार्यक्रममा दिइएको थियो।
२०७५ सालदेखि गम्भीर स्वास्थ्य समस्यासँग संघर्ष गर्दै आएका भुसाल पछिल्ला वर्षहरूमा सामाजिक, धार्मिक तथा सामुदायिक क्षेत्रका विभिन्न गतिविधिमा संलग्न हुँदै आएका छन्।
स्थानीय समुदायले नयाँ मन्दिर स्थापना र सार्वजनिक हस्तान्तरणले क्षेत्रको धार्मिक, सांस्कृतिक तथा पर्यटन संभावनामा सकारात्मक प्रभाव पर्ने अपेक्षा व्यक्त गरेका छन्।
सरोकारवालाहरूका अनुसार मन्दिर सञ्चालन व्यवस्थापनमा स्थानीय समिति तथा समुदायको सक्रिय सहभागिता रहनेछ।
प्रकाशित मिति: २०८२ कार्तिक २९ गते
