झापाका युवा अभियन्ता र ट्रेकिङप्रेमी लोचन पौडेलको सपना अधुरै रह्यो। साथीहरूसँग रारा घुम्न निस्किएका उनी बुटवल–गोरुसिङ्गे सडकखण्डमा मोटरसाइकल दुर्घटनामा परेर ज्यान गुमाए।
शुक्रबार साँझ करिब ५ बजे भएको दुर्घटनामा झापाको बुद्धशान्ति गाउँपालिकाका पौडेल गम्भीर घाइते भए। उनको उपचारका लागि कपिलवस्तु अस्पताल लगिएको थियो, तर चिकित्सकले उनलाई मृत घोषणा गरेका थिए।
पौडेल बुद्धभूमि नगरपालिका–२, गोरुसिङ्गेमा प्र १–०१–०१४ प १८६४ नम्बरको मोटरसाइकलमा सवार अवस्थामा, पूर्वबाट पश्चिमतर्फ जाँदै गरेको बा प्र ०१–००३२ च ८७६६ नम्बरको भ्यानसँग ठोक्किएका थिए। त्यसपछि मोटरसाइकल पुनः लु ३ च ७५७ नम्बरको स्कारपियोसँग ठोक्किएको थियो।
गम्भीर घाइते भएपछि उपचारका लागि अस्पताल पुर्याइएको भए पनि उनको ज्यान जोगाउन सकिएन।
मृतक लोचन पौडेल ट्रेकिङ अभियान ‘ट्रेक ८५८६’का सदस्य थिए। उनी “केचना देखी लोवुचे” अभियानमार्फत पर्यटन प्रवर्द्धन गर्ने योजना राख्थे। उनका सहकर्मी दीपेन्द्र गणेशका अनुसार, पौडेलको सक्रियता र उमंगले स्थानीय युवाहरूमा प्रेरणाको स्रोत बनेको थियो।
यो दुर्घटनाले केवल परिवार र साथीहरूलाई मात्र होइन, कपिलवस्तु र झापाका युवाहरूमाझ समेत गहिरो शोक छाएको छ।
प्रकाशित मिति: २०८२ आश्विन २५ गते
