कपिलवस्तु, विजया दशमी, दीपावली र छठजस्ता प्रमुख चाडपर्वलाई लक्षित गर्दै कपिलवस्तुमा विशेष सुरक्षा योजना लागू गरिएको छ। सम्भावित आपराधिक गतिविधि र अवाञ्छित घटनालाई नियन्त्रणमा लिन नेपाल प्रहरी, सशस्त्र प्रहरी र अन्य सुरक्षा निकाय गरी करिब १७ सय सुरक्षाकर्मी जिल्लाभरि परिचालन गरिएको छ।
जिल्ला प्रमुख जिल्ला अधिकारी (प्रजिअ) दिलकुमार तामाङका अनुसार, धार्मिक र साम्प्रदायिक विवाद, पटाकाजन्य बिष्फोटक पदार्थको अवैध कारोबार, चोरी–लुटपाट, जुवातास, मदिरा र लागुऔषध सेवन, सवारी दुर्घटना र कालोबजारी नियन्त्रणलाई प्राथमिकता दिँदै रणनीति तयार गरिएको हो।
प्रजिअ तामाङले हालैको जेनजी आन्दोलनको क्रममा कैदीबन्दीहरू फरार भएको घटनालाई पनि ध्यानमा राखी सुरक्षा सतर्कता अझ कडा पारिएको जानकारी दिए।
जिल्ला सुरक्षा समितिको संयोजनमा बनेको योजनाअनुसार:
- १,००० नेपाल प्रहरी
- ५०० सशस्त्र प्रहरी
- अन्य जिल्लाबाट थप २००+ सुरक्षाकर्मी परिचालन गरिएको छ।
पूर्व–पश्चिम राजमार्गमा रात्रीकालीन गस्ती, सीमा क्षेत्रमा निगरानी र संवेदनशील स्थानमा सुरक्षा जाँच कडाइका साथ हुने भएको छ।
प्रहरी उपरीक्षक (एसपी) सन्तोष आचार्यका अनुसार, कपिलवस्तु प्रहरी र सशस्त्र प्रहरी बल नं २८ गणले संयुक्त रूपमा योजना कार्यान्वयनमा ल्याएका छन्।
यसैगरी, नेपाली सेनाले पनि वार्षिक तालिका अनुसार गस्ती बढाउने र सीमा क्षेत्रमा निगरानी सशक्त बनाउने जनाएको छ।
चाडपर्वको समयमा जिल्लावासीलाई निश्चिन्त रूपमा पर्व मनाउन सकिने गरी प्रभावकारी सुरक्षा व्यवस्था लागू गरिएको सुरक्षा निकायले जनाएको छ। साथै, भारतबाट फर्किने नेपाली नागरिकलाई सहज रुपमा गन्तव्यसम्म पुग्न सहजीकरण गरिने जानकारी पनि दिइएको छ।
प्रकाशित मिति: २०८२ आश्विन १० गते
