नेकपा एमालेको ललितपुरको गोदावरीमा जारी दोस्रो विधान महाधिवेशनमा पेश गरिएका राजनीतिक, विधान संशोधन र सांगठनिक प्रतिवेदनहरूमाथि आजदेखि समूहगत छलफल सुरु भएको छ।
महाधिवेशनको दोस्रो दिन प्रतिनिधिहरूलाई १० समूहमा विभाजन गरी छलफल थालिएको हो। महाधिवेशनमा अध्यक्ष केपी शर्मा ओलीले राजनीतिक प्रतिवेदन, उपाध्यक्ष विष्णुप्रसाद पौडेलले विधान संशोधनसम्बन्धी प्रस्ताव, र महासचिव शंकर पोखरेलले संगठनात्मक प्रतिवेदन प्रस्तुत गरेका छन्।
यसका अतिरिक्त, केन्द्रीय सल्लाहकार परिषद्, अनुशासन आयोग, लेखा आयोग र निर्वाचन आयोगका तर्फबाट समेत प्रतिवेदनहरू पेश गरिएको छ। तर, स्थायी समिति सदस्य कर्ण थापाले केन्द्रीय कार्यालयमा दर्ता गराएको फरक मतसहितको प्रतिवेदन भने अध्यक्ष ओलीले पेश गर्न अनुमति दिएका छैनन्। फरक मतलाई स्थान दिने भनिएपनि, समय अभाव देखाउँदै प्रतिवेदन पेस गर्न रोकिएको हो।
महाधिवेशनमा २,०२६ जना प्रतिनिधि र ३१५ जना आयोजकसहित कुल २,३४१ जनाको सहभागिता रहेको छ। महाधिवेशन भोलिसम्म जारी रहनेछ।
प्रकाशित मिति: २०८२ भाद्र २१ गते
